Feeds:
Posts
Comments

Posts Tagged ‘කැප්පිටියාගොඩ සිරිවිමල නාහිමි’

ඉතිහාසයේ කිසිදාක සිදු නොවූ තරම් මේ මොහොතේ ශ්‍රී ලාංකික සිංහල ජනසමාජයත්, රටත් බරපතල ලෙස අර්බුදයකට මුහුණපාමින් සිටින බව නොරහසකි. ඇතැම් දෙස්‌ විදෙස්‌ බලවේග මේ රටේ උරුමයන් විකෘති කිරීමට, විනාශ කිරීමට මාන බලමින්, උපක්‍රම යොදමින් ක්‍රියා කරන අයුරු බියජනකය. විශේෂයෙන් රට තුළ නොයෙක්‌ වෙනස්‌කම් සිදු කිරීමට දරන උත්සාහයන් ගැන මේ වකවානුවේ විමසිලිමත් විය යුතුය. නව ආණ්‌ඩුක්‍රම ව්‍යවස්‌ථාව සැකසීමට දරන ප්‍රයත්නය ලැබෙන ආරංචි අනුව දේශයේ උරුමකරුවන්ට හිතකර බවක්‌ නොපෙනෙයි. රාජ්‍ය නොවන සංවිධාන හා යටපත් වී ඇති ත්‍රස්‌ත සංවිධාන යළිත් හිස එසවීමට දරන ප්‍රයත්නයන් කෙරෙහි ආරක්‍ෂක පවුරක්‌ ලෙස වටකොට තොරතුරු සෙවීම යුගයේ ජනමාධ්‍යයේ වගකීමකි. පවතින ඇතැම් මාධ්‍යයන් මෙකී බලවේගයන්ට උඩගෙඩි දෙනවා විනා ඒවා නිවැරදි කිරීමට හෝ රටට හෙළි කිරීමට ප්‍රයත්න දරන බවක්‌ නොපෙනේ. එබැවින් සියලුම ජනමාධ්‍යයන් වගකීමකින් යුතුව ක්‍රියා කළ යුතුව ඇති කාලය එළඹ ඇතැයි පෙන්වා දීමට කැමැත්තෙමි.

මේ රටේ වසර 30 කට අධික කාලයක්‌ පැවති යුද මානසිකත්වයෙන් රට ගලවා ගත් රණවිරුවන්ගේ ජීවිත පරිත්‍යාගය අවතක්‌සේරු වන වැඩ දැන් සිදුවෙමින් පවතින බවක්‌ පෙනී යයි. කුරිරු ත්‍රස්‌තවාදී යුද සමයේදී දහස්‌ ගණන් ජීවිත පූජා කළේ රට කැබැලි කොට ජාතිවාදී පදනම මත ප්‍රාන්ත පිහිටුවීමට නම් එදා අපේ දරුවන්ගේ ජීවිත බිලි නොදී එක පෑන් පහරින් හිටපු නායකයන්ට ඒ දේ කළ හැකිව තිබිණි. එබැවින් මේ සඳහා පෙළ ගැසී සිටින දෙස්‌ විදෙස්‌ කුමන්ත්‍රණකරුවන්ගේ උත්සාහයන් පරාජය කළ යුතුව ඇත. අද ඇතැම් මැති ඇමැතිවරුන් බුදු දහමට හා ශාසනයට ඇඟිලි ගැසීමට දරන උත්සාහයන් පිළිබඳ අපට ඇත්තේ බරපතල ගැටලුවකි. පසුගිය කාලයේ ථෙරවාදී පනත මහා සංඝයා මැදිහත් වී බැහැර කළ අතර එය සංඝයාගේ කටයුත්තක්‌ බව පැහැදිලිව පෙන්වා දුන් විට පනත හකුළා ගත් ඔවුන් එය වෙනත් මුහුණුවරකින් ඉදිරිපත් කරන්නට සූදානම් වන්නේ කවර යටි අරමුණක්‌ සඳහා දැයි විමසා බැලිය යුතුය. සංහිඳියාවේ මුවාවෙන් සිදු කෙරෙන වෙනස්‌කම් සිංහල බෞද්ධයාගේ අයිතීන් නොතකා කරන්නේ නම් මේ රටේ මහා සංඝයා ඒ වෙනුවෙන් නැඟී සිටිය යුතුය. පාලකයන්ගේ වගකීම විය යුත්තේ බිඳ වැටී ඇති ආර්ථිකය ගොඩගැනීමට කටයුතු කොට ජනතාවට පහසුවෙන් ජීවත් වීමට මඟ සැලසීම විනා නැති ප්‍රශ්න ඇතිකරගෙන රට අවුල් කිරීම නොවේ.

මේ රටට නව ආණ්‌ඩු ක්‍රම ව්‍යවස්‌ථාවක්‌ කිසිසේත් අවශ්‍ය නොවේ. ඡේ.ආර්. ජයවර්ධන ජනාධිපතිතුමා වැනි දුර දක්‌නා නුවණින් යුක්‌ත ප්‍රබල නායකයින් මෙය නිර්මාණය කොට ඇති බව සිහිපත් කරන අතර මෙකී ව්‍යවස්‌ථාව තුළ ඇති විධායක බලය හා සම්බන්ධ ඇතැම් වගන්ති සංශෝධනයට ලක්‌ කිරීම පමණක්‌ ප්‍රමාණවත් වේ. ජනතාවගේ ඉල්ලීම වූයේ ද එයයි. අවුල් සහගත පාලන ව්‍යqහයක්‌ සැකසී ඇති මේ මොහොතේ වගකීමකින් තොරව ව්‍යවස්‌ථා සැකසීම හානිකරය. ජාතික ආණ්‌ඩුවක්‌ යෑයි කීමට ජාතික ආණ්‌ඩුවක ආකෘතියක්‌ ප්‍රකට නොවන තැන විවිධ මැතිඇමතීන් තම තමන්ගේ න්‍යාය පත්‍රයන්ට අනුව ක්‍රියා කරන හා කතාබහ කරන යුගයක ව්‍යවස්‌ථාවක්‌ වැනි රටට බලපාන බරපතල කටයුත්තක්‌ කිසිසේත් නොකළ යුතුමය.

රජය මේ රටේ අනාගතය ගැන සිතා තීන්දු ගන්නා බවක්‌ අපට නොපෙනේ. නුදුරේදීම ශ්‍රී ලංකාව හා ඉන්දියාව අතර අත්සන් කිරීමට යන එට්‌කා ගිවිසුම බැලු බැල්මට අයිසින් ගෑ කේක්‌ ගෙඩියක්‌ සේ පෙනුණ ද යට ඇති කේක්‌ ගෙඩිය විෂ යොදා ඇති බව රජයට නොතේරේ. මේ රටේ වියතුන් බුද්ධිමතුන් අනතුරු අඟවද්දී එට්‌කා ගෙන ඒමට දරන උත්සාහය නිසා අනාගතයේ ශ්‍රී ලංකාව ඉන්දියානු ප්‍රාන්තයක්‌ වීම නොවැළැක්‌විය හැකිය. මෙයටම ලැබෙන තවත් භයානක තීරණයකි, දෙරට යා කෙරෙන පාලමක්‌ ඉදිකිරීම. මේවා මේ රටේ ජනතාව ඉල්ලූ දේ නොවේ. ඉල්ලූ දේ පසෙක තබා ජනතාවට තිත්ත දේ දෙන්න උත්සාහ කරන්නේ ඇයි දැයි විමසිය යුතුය. මෙම ගිවිසුම මගින් සිදුවන්නේ දකුණු ඉන්දියානුවන්ට ලක්‍ෂ ගණනින් නිදහසේ රටට ඇතුළුවීමට හැකිවීමයි. යළි ත්‍රස්‌තවාදය හිස එසවීමට ද ඉඩකඩ ඇති අතර එවිට රජයට කිසිසේත් එය පරාජය කිරීමට ඉඩකඩ ලැබෙන්නේ නැත. මේ රටේ ඉඩකඩම් ඉන්දියානුවන් සතු වීම ද වැළැක්‌විය නොහැකිය. විරැකියාවෙන් පෙළෙන්නන් ලක්‍ෂ ගණනින් සිටින අපේ රටේ රැකියා අවස්‌ථා ද ඉන්දියානුවන්ට ලබාදී යටත්විජිතයක්‌ බවට පත් විය හැකිය. අධිරාජ්‍යවාදීන්ගේ යුගයේ කන්ද උඩරටට පැමිණි ශ්‍රමිකයන් අද වන විට වෙනම පාලනයක්‌ ඉල්ලා සිටීමට තරම් ප්‍රබල වී ඇති අයුරු මෙයට හොඳම නිදසුනකි. මෙවන් ප්‍රකට සරල සාධක පවා අවධානයට යොමු නොකර රජය මෙවන් අදූරදර්ශී තීරණ ගන්නට උත්සාහ දරන්නේ ඇයි දැයි ජනතාව ප්‍රශ්න කර සිටිති.

මේ මොහොත වන විට මේ රටේ දෙපයින් නැගී සිටීමට, හුස්‌ම ගැනීමට බියකරු හද ගැස්‌ම සනහාලීමට ජීවිත පරිත්‍යාගයෙන් කටයුතු කළ රණවිරුවන් රට වෙනුවෙන් ඔවුන් සිදුකළ යුද මෙහෙයුම් වලදී අතුරුදන් වූවා යෑයි සැලකෙන්නන් පිළිබඳ තොරතුරු සෙවීමට කාර්යාලයක්‌ පිහිටුවීමට මහජන නියෝජිතයන්ගේ ඡන්දයකින් තොරව පාර්ලිමේන්තුව තුළ ගාලගෝට්‌ටි මත සම්මත කර ගැනීම බරපතල ගැටලුවකි. බටහිර ජාතීන්ගේ ඕනෑඑපාකම් ඇමැතිවරුන් කීපදෙනෙකුගේ අවශ්‍යතා මත ඉටුකරදීමට කටයුතු කරන්නේ මේ රටේ උපන් රණවිරුවන්ගේ ජීවිත පිළිබඳ අවතක්‌සේරු කරමින් නොවේද? යුද පිටියේදී මිය ගිය ත්‍රස්‌තවාදීන් ද අතුරුදන් වූවෝ වෙති. ඔවුන්ගේ ඥාතීන් මෙම කාර්යාලයට ඔවුන් පිළිබඳ තොරතුරු ඉදිරිපත් කිරීමේදී ත්‍රස්‌තවාදීන් අහිංසකයන් සේ සලකා කටයුතු කිරීමට ඇති ඉඩකඩක්‌ පවතී. මෙම පනත සම්මත කර ගැනීමෙන් ඇතැමුන් අපේක්‍ෂා කර ඇත්තේ ත්‍රස්‌තවාදය තුරන් කිරීම සඳහා අණ දුන් දේශපාලන නායකයන් දඩයම් කිරීමට විය හැක. එසේ නොවේ, නම් තමන්ට රටක්‌ ලබාදුන් රණවිරුවන් පිළිබඳ ලෝකයට තොරතුරු ලබාදීමට උත්සාහ දරනු ලබන්නේ වෙන කවර අවශ්‍යතාවක්‌ සඳහා දැයි ජනතාව ප්‍රශ්න කර සිටී. පිළිගත් සම්ප්‍රදායන් පවා නොතකමින් හදිසියේම මෙවන් පනතක්‌ සම්මත කිරීමම රටට ජාතියට සිදු කරන ෙද්‍රdaහිකමක්‌ යෑයි ඔවුහු පවසති. අගතියෙන් තොරව රට ගැන සිතා ක්‍රියා කිරීමට වගකීමක්‌ ඇති සුදුසු විරුද්ධ පක්‍ෂයක්‌ නොමැති වීම රටට විපතකි. මහජන නියෝජිතයන් ජනතාවට වගකිව නොහැකි වන සේ ක්‍රියා නොකරන අතර රූකඩයන් ලෙස කටයුතු කිරීම පිළිකුලට කරුණකි. එබැවින් මේ පිළිබඳව ජනාධිපතිතුමා මැදිහත්ව රණවිරුවන් හා රට ගලවා ගැනීමට ක්‍රියා කළ දේශපාලන නායකයන් ආරක්‍ෂා කිරීම උදෙසා ක්‍රියා කළ යුතුය. මේ රට භාර දී ඇත්තේ ජනාධිපතිතුමාට මිස හිතුවක්‌කාර ලෙස අත්තනෝමතිකව වෛරයෙන් තීරණ ගන්නා ඇතැම් මැතිඇමැතිවරුන්ට නොවන බවද දැඩිව අවධාරණය කර සිටිමි. එසේ නොවේ නම් මේ රටේ ඉරණම තීරණය කරන මේ මොහොතේ ජනතාව සිහි බුද්ධියෙන් ක්‍රියා කළ යුතු අතර මාධ්‍යයට ද මේ කරුණු පිළිබඳ බරපතල වගකීමක්‌ ඇති බව සඳහන් කළ යුතුය.

විශේෂයෙන් මේ රටේ ජාතියේ මුරදේවතාවුන් සේ සැළකෙන මහා නායක මාහිමිපාණන් වහන්සේලා ප්‍රමුඛ කොට ඇති මහසඟරුවන අවදියෙන් සිටිය යුතු කාලය එළඹී ඇති බව ගෞරවයෙන් සිහිපත් කිරීමට කැමැත්තෙමි.

කැප්පිටියාගොඩ සිරිවිමල නාහිමි
පේරාදෙණිය ගැටඹේ රාජෝපවනාරාමාධිපති

Advertisements

Read Full Post »