එක්‌සත් ජනතා නිදහස් සන්ධාන ආණ්‌ඩුවේ කර්මාන්ත හා වාණිජ ඇමැති රිෂාඩ් බදුර්දීන් මහතාගේ නායකත්වයෙන් යුත් සමස්‌ත ලංකා මහජන කොන්ග්‍රසයෙන් නැගෙනහිර පළාත් සභාවට මඩකලපුව දිස්‌ත්‍රික්‌කය නියෝජනය කරමින් පත්වී සිටි එස්‌. එම්. සුබයිර්, අමිර් අලි සහ සිබ්ලි ෆාරුක්‌ යන මන්ත්‍රීවරුන් පසුගිය 25 දා සන්ධාන පාලක පක්‍ෂයෙන් ඉවත්වී ස්‌වාධීනව කටයුතු කිරීමට තීරණය කිරීමත් සමග එම පළාත් සභාව තුළ අර්බුදයක්‌ පැනනැඟී තිබේ.
නැගෙනහිර පළාත් සභාවේ එක්‌සත් ජනතා නිදහස් සන්ධානයට මන්ත්‍රීන් 22 ක්‌ ද වික්‍ෂයට මන්ත්‍රීන් 15 ක්‌ද සිටිති. එහි ආණ්‌ඩු පක්‍ෂය සකස්‌වී ඇත්තේ ශ්රී ලංකා නිදහස් පක්‍ෂයෙන් 7 ක්‌ ශ්රී ලංකා මුස්ලිම් කොන්ග්‍රසයෙන් 7 ක්‌ සමස්‌ත ලංකා මහජන කොන්ග්‍රසයෙන් 3 ක්‌ සහ ඒ. එල්. එම්. අතාවුල්ලා ඇමැතිවරයාගේ ජාතික කොන්ග්‍රසයෙන් 3 ක්‌, පිල්ලෙයාන්ගේ තමිල් මක්‌කල් විධුතලෙයි පුලිගල් පක්‍ෂයෙන් 01 ක්‌ සහ ජාතික නිදහස් පෙරමුණේ 01 මන්ත්‍රීවරයෙක්‌ වශයෙනි.
දෙමළ ජාතික සන්ධානයේ මන්ත්‍රීවරුන් 7 කින් හා එක්‌සත් ජාතික පක්‍ෂයේ මන්ත්‍රී වරුන් 07 කින් විපක්‍ෂය සෑදී ඇත.
නැගෙනහිර පළාත් සභාව පිහිටුවනු ලැබූ අවස්‌ථාවේ ශ්‍රීලනිපයේ නජීබ් අබ්දුල් මජීඩ් මහතා ප්‍රධාන ඇමැති ධුරයට පත්වූයේ දෙවසරක කාලයක්‌ සඳහාය. ඉතිරි වසර 02 සඳහා ප්‍රධාන ඇමැති ධුරය මුස්ලිම් කොන්ග්‍රසයට ලබාදිය යුතු බවට සන්ධාන නායකයින් හා මුස්ලිම් කොන්ග්‍රසය අතර ගිවිසුමක්‌ ඇති කරගනු ලැබීය. ඒ අනුව 2015 මාර්තු මාසයේදී නජීඩ් අබ්දුල් මජීඩ් ප්‍රධාන ඇමැතිවරයා ඉවත්වී එම තනතුර මුස්ලිම් කොන්ග්‍රසයට ලබාදිය යුතුව තිබේ.
නැගෙනහිර පළාත් සභාවේ ඇමැති ධුර වලට පත්කිරීමේදී ශ්රී ලනිපයට එක්‌ ඇමැති ධුරයක්‌ද ශ්රී ලංකා මුස්ලිම් කොංග්‍රසයට ඇමැති ධුර 02 ක්‌ද අතාවුල්ලා මහතාගේ ජාතික කොන්ග්‍රසයට එක්‌ ඇමැති ධුරයක්‌ද හිමිවිය.
එහෙත් මන්ත්‍රීවරුන් තිදෙනකු සිටින රිෂාඩ් බදුර්දීන් ඇමැතිවරයාගේ සමස්‌ත ලංකා මහජන කොන්ග්‍රසයට ලැබුණේ පළාත් සභාවේ නියෝජ්‍ය සභාපති ධුරය පමණි.
එම පක්‍ෂයෙන් තේරී පත්වූ පළාත් සභා මන්ත්‍රීන් තිදෙනා අතර 2005-2010 කාලයේ පාර්ලිමේන්තුවට තේරී පත්වී නැවත පදිංචි කිරීමේ හා ප්‍රති සංස්‌කරණ නියෝජ්‍ය ඇමැති ධුරය දැරූ අමීර් අලි මහතාද වෙයි. අමිර් අලි මහතාට පළාත් සභාවේ ඇමැති ධුරයක්‌ ලබාදීමට නොහැකි වූ බැවින් ඔහු ජාතික ලැයිස්‌තුවෙන් පාර්ලිමේන්තු මන්ත්‍රීවරයකු වශයෙන් පත්කොට නියෝජ්‍ය ඇමැති ධුරයක්‌ ලබාදෙන බවට සන්ධාන මහලේකම් සුසිල් ප්‍රේමජයන්ත සහ බැසිල් රාජපක්‍ෂ යන ඇමැතිවරු පොරොන්දු වූ බව සමස්‌ත ලංකා මහජන කොන්ග්‍රසය කියයි.
අමිර් අලි මහතා ජාතික ලැයිස්‌තු මන්ත්‍රීවරයකු වශයෙන් පත් කිරීම සඳහා ජාතික ලැයිස්‌තු මන්ත්‍රීවරියක වන මාලිනී ෆොන්සේකා මහත්මිය සන්ධාන නායකයන්ගේ ඉල්ලීම අනුව ඉල්ලා අස්‌වූවාය. එහෙත් මෙම ගිවිසුම ගැන දැන නොසිටි ජනාධිපති මහින්ද රාජපක්‍ෂ මහතා මාලිනී ෆොන්සේකා මහත්මියගේ ඉල්ලා අස්‌වීම අස්‌කර ගන්නා ලෙස ඇයට දැනුම්දී තිබිණි.
නැගෙනහිර පළාත් සභාව පත්වී වසර 2 ක්‌ ගතවී ඇතත් අමිර් අලි මහතාට තනතුරක්‌ නොලැබීම ගැන සමස්‌ත ලංකා මහජන කොන්ග්‍රසය පසුවන්නේ දැඩි කලකිරීමකිනි. එම පක්‍ෂයේ මධ්‍යම කාරක සභාව පසුගිය 25 දා රැස්‌වී ඔවුන්ගේ මන්ත්‍රීන් තිදෙනා නැගෙනහිර පළාත් සභාවේ පාලක පක්‍ෂයෙන් ඉවත්වී ස්‌වාධීනව කටයුතු කළ යුතු යෑයි තීරණය කළේ මේ නිසා බව එහි ප්‍රකාශකයෙක්‌ පැවසීය.
කෙසේ වුවද ජනාධිපතිවරණය ජනවාරි මාසයේ පැවැත්වෙන බැවින් නැගෙනහිර මුස්ලිම් ඡන්ද රැකගැනීමේ අරමුණින් ආණ්ඩුව දැන් අමිර් අලි මහතා පාර්ලිමේන්තුවට පත් කිරීම ගැන දැඩි අවධානය යොමුකොට ඇතැයි දැනගන්නට තිබේ. මේ අනුව ජාතික ලැයිස්‌තුවෙන් පත්වී සිටින ඒ. එච්. එම්. අස්‌වර් මන්ත්‍රීවරයාට ඉල්ලා අස්‌වන ලෙස දැනුම් දී එම පුරප්පාඩුවට අමිර් අලි මහතා පත් කිරීමට ආණ්ඩුව අදහස් කොට ඇතැයි දැන ගන්නට තිබේ.
මේ අතර රිෂාඩ් බදුර්දීන් ඇමැතිවරයාගේ සමස්‌ත ලංකා මහජන කොන්ග්‍රසයේ වන්නි දිස්‌ත්‍රික්‌ පාර්ලිමේන්තු මන්ත්‍රී උවයිස්‌ µdරුක්‌ මහතා පසුගිය 26 දා එක්‌සත් ජාතික පක්‍ෂයට එක්‌වී පොදු අපේක්‍ෂක මෛත්‍රිපාල සිරිසේන මහතාට සහාය පළකරන බව කියා සිටියේය. එය පක්‍ෂයේ තීරණයක්‌ නොවන බැවින් උවයිස්‌ µdරුක්‌ මහතා පක්‍ෂ සාමාජිකත්වයෙන් ඉවත් කරන බව සමස්‌ත ලංකා මහජන කොන්ග්‍රසයේ මහ ලේකම් වයි. එල්. එස්‌. එස්‌. හමීඩ් මහතා පවසයි.
මෙයින් පෙනී යන්නේ සමස්‌ත ලංකා මහජන කොන්ග්‍රසය නැගෙනහිර පළාත් සභාවේ තම මන්ත්‍රීන් තිදෙනා ස්‌වාධීන කිරීමෙන් ආණ්‌ඩුවට බලපෑමක්‌ කිරීම සඳහා මෙම පියවර ගත් බවයි. නැගෙනහිර පළාතේ මඩකලපු දිස්ත්රික්කයේ මුස්ලිම් ඡන්ද ආණ්‌ඩුවට ඉතා වැදගත් බැවින් ඔවුන්ගේ මෙම ක්‍රියාවට යහපත් ප්‍රතිචාර ආණ්‌ඩුවෙන් ලැබෙනු ඇත.
එසේ වුවද මුස්ලිම් ජනතාව එක්‌සත් ජනතා නිදහස් සන්ධානයෙන් ඉවත්වීමට පටන්ගැනීම නිසා සමස්‌ත ලංකා මහජන කොන්ග්‍රසයට මෙන්ම ශ්රී ලංකා මුස්ලිම් කොන්ග්‍රසයටද තමන්ගේ ඡන්ද පදනම රැක ගැනීම සඳහා දැඩි උත්සාහයක් ගැනීමට සිදුවී තිබේ. බොදු බලසේනා සංවිධානයේ මුස්ලිම් විරෝධී කටයුතු නිසාත් එම සංවිධානයට ආණ්‌ඩුවේ අනුග්‍රහය ලැබෙන බවට මුස්ලිම් ජනතාව තුළ විශ්වාසයක්‌ ගොඩනැඟී තිබීම නිසාත් මුස්ලිම් ජනතාව ඈත්වීමට පටන්ගෙන ඇතැයි මුස්ලිම් කොංග්රසයේ ප්‍රකාශකයෙක්‌ අප සමග කීය.
මේ තත්ත්වයන් යටතේ සමස්‌ත ලංකා මහජන කොන්ග්‍රසයේ මධ්‍යම කාරක සභාව පසුගිය 25 දා රැස්‌වූ අවස්‌ථාවේ එහි සාමාජිකයන් 37 දෙනා ගෙන් 25 දෙනකුම පවසා ඇත්තේ පක්‍ෂය ආණ්‌ඩුවෙන් ඉවත් විය යුතු බවයි.
එහෙත් පක්‍ෂයේ නායක රිෂාඩ් බදුර්දීන් ඇමැතිවරයා මේ පිළිබඳව තවදුරටත් සාකච්ඡා කිරීම සඳහා පක්‍ෂයේ පළාත් පාලන මන්ත්‍රීවරුන් 68 දෙනා දෙසැම්බර් 3 දා කොළඹට කැඳවා තිබේ. ඒ අතරම පක්‍ෂයට හිතවත් බුද්ධිමතුන්, උගතුන්, නීතිඥයන්, උලමාවරුන් ඇතුළු විද්වතුන් පිරිසක්‌ද එදිනට කැඳවා ඇති රිෂාඩ් බදුර්දීන් මහතා තම පක්‍ෂය ආණ්‌ඩුවේ සිටිය යුතුද යා යුතුද යන්න පිළිබඳව තීරණයක්‌ ගැනීමට කටයුතු කරමින් සිටී.
එසේම ඒ මහතා වන්නි දිස්ත්රික්කයේ ඔහුගේ මෙහෙයවීමෙන් නිවාස තනාදී පදිංචි කළ ජනතාවගෙන් අදහස් විමසීමට යන බවද එම පක්‍ෂයේ ප්‍රකාශකයා තවදුරටත් කීය.
මේ අතර මැලේසියාවේ පාලක පක්‍ෂය වන එක්‌සත් මැලේ ජාතික සංවිධානයේ (ඹඵභධ) ජාතික සම්මේලනයට සහභාගිවීම සඳහා ක්‌වාලාලම්පූර් බලා ගොස්‌ සිටි මුස්ලිම් කොන්ග්‍රස්‌ නායක ඇමැති රාවුµa හකීම් සහ මහලේකම් හසන් අලි යන මහත්වරු සිකුරාදා (28 දා) පෙරළා ශ්රී ලංකාවට පැමිණි අතර ඉදිරි ජනාධිපතිවරණයේදී මුස්ලිම් කොන්ග්‍රසය ගතයුතු ක්‍රියාමාර්ග පිළිබඳව තීරණයක්‌ ගැනීම සඳහා එම පක්‍ෂයේ උත්තරීතර මණ්‌ඩලය මේ සතියේ රැස්‌වීමට නියමිතය.
මුස්ලිම් කොන්ග්‍රසය සහ සමස්‌ත ලංකා මහජන කොන්ග්‍රසය එක්‌සත් ජනතා නිදහස් සන්ධානයෙන් ඉවත් වුවද නැගෙනහිර පළාත් සභාවේ සන්ධාන පාලනය පෙරළා දැමීමට කටයුතු නොකරනු ඇතැයි දැනගන්නට තිබේ.
එයට හේතුව එම පළාත් සභාව පෙරළා දැමූ විට නැගෙනහිර පළාතේ විශේෂයෙන්ම මඩකලපුව දිස්ත්රික්කයේ මුස්ලිම් බලය යටපත්වී දෙමළ ජාතික සන්ධානය ඉස්‌මතු වීමට තිබෙන හැකියාවයි.
එසේම වන්නි දිස්‌ත්‍රික්‌කයෙන්ද සමස්‌ත ලංකා මහජන කොන්ග්‍රසය හා මුස්ලිම් කොන්ග්‍රසය ආණ්‌ඩුවෙන් ඉවත් වුවහොත් වන්නියේ හා උතුරේ දෙමළ ජාතිකයන්ගේ සහ කතෝලික බලය ඉහළ යනු ඇති බවද මුස්ලිම් නායකයන් අතර බියක්‌ පවතී.
මේ තත්ත්වයන් යටතේ ආණ්‌ඩුවෙන් යැම හෝ ආණ්‌ඩුවේ තවදුරටත් රැඳී සිටීම පිළිබඳව තවදුරටත් ගැඹුරින් කල්පනා කොට තීරණ ගැනීමට මුස්ලිම් පක්‍ෂවලට සිදුවී තිබේ.
විශේෂයෙන්ම නැගෙනහිර පළාත් සභාවේ ප්‍රධාන ඇමැති ධුරය 2015 මාර්තු මාසයේදී ශ්රී ලංකා මුස්ලිම් කොන්ග්‍රසයට ලැබීමට නියමිතව තිබීම නිසාද ආණ්‌ඩුවෙන් යැම එම පක්‍ෂයට බලවත් ප්‍රශ්නයක්‌ වී ඇත.
එසේම මුස්ලිම් ඡන්ද දායකයන් මුස්ලිම් පක්‍ෂවලින් ඈත්වී යන අන්දම පසුගියදා පැවැති ඌව පළාත් සභා මැතිවරණයේදී පැහැදිලි විය.
ශ්රී ලංකා මුස්ලිම් කොන්ග්‍රසය හා ආතාවුල්ලා ඇමැතිවරයාගේ ජාතික කොන්ග්‍රසය ඌවේ මුස්ලිම් සංවිධානයක්‌ සමග එක්‌වී එම මැතිවරණයට තරග කළේය. බදුල්ල දිස්ත්රික්කයේ මුස්ලිම් ඡන්ද 25000 ක්‌ පමණ ඇත. එහෙත් ඔවුන්ගෙන් සන්ධානයට ලැබුණේ ඡන්ද 5000 කි. මුස්ලිම් ජනයා බහුතරයක්‌ වාසය කරන බදුල්ල, හාලිඇල හා වැලිමඩ ඡන්ද කොට්‌ඨාසවලින් ජයගෙන තිබුණේ එජාපයයි. බොදුබල සේනා සංවිධානයේ මූලිකත්වයෙන් සිදු කෙරෙන මුස්ලිම් විරෝධී කටයුතු මෙයට හේතු වූ බව මුස්ලිම් නායකයන්ගේ මතයයි. එසේම මුස්ලිම් ඡන්ද දායකයන් මෙහෙයවීමේ ශක්‌තිය මුස්ලිම් පක්‍ෂවලින් ගිලිහී යන බවක්‌ද මෙයින් පෙනෙන්නට ඇත.
එසේම ආණ්ඩුව තුළ සිටීමෙන් මුස්ලිම් ජනතාවට ව්‍යාපාරික පැත්තෙන් ලැබෙන වාසි, හා රජයෙන් ලැබෙන වරප්රසාද සහ ආරක්‍ෂාව පිළිබඳ ගැටලු නිසා ආණ්‌ඩුවෙන් ඉවත්වීම ද මුස්ලිම් කොන්ග්‍රසය, සමස්‌ත ලංකා මහජන කොන්ග්‍රසය හා ජාතික කොන්ග්‍රසය ආදී මුස්ලිම් පක්‍ෂවලට ප්‍රශ්නයක්‌වී ඇත.
කෙසේ වුවද ඉදිරි ජනාධිපතිවරණයේදී එම පක්‍ෂවලට අවශ්‍ය තීරණයක්‌ ගැනීමට සිදුවීම නොවැළැක්‌විය හැකිය.
The Eight Man Team 